تقليل المرتجعات: سياسة الـ 3 أيام والمنتجات اللي مبترجعش

العميل استلم ودفع، والربح ظهر في محفظتك على إنه متوقع، فقلت خلاص البيعة خلصت. بعد يومين المنتج رجع، والربح اختفى، والإعلان متدفع. الرفض عند الباب بتعرفه في نفس اليوم. إنما الإرجاع بعد الاستلام بييجي بعد ما صدقت إن الفلوس في جيبك. عشان كده تقليل المرتجعات مش رفاهية، ده حماية لربح كسبته خلاص.

الإرجاع بيكلفك كام

مثال بأرقام افتراضية: سلّمت 20 طلب، الربح المضاف 120 جنيه في الطلب، والإعلان كلفك 50 جنيه لكل طلب مستلم، يعني 1,000 جنيه.

من غير مرتجعات: 20 × 120 = 2,400، وبعد عمولة تحسين 4% يبقوا 2,304. تشيل الإعلان يفضل 1,304.

لو رجع 3: يفضل 17 طلب بـ 2,040، وبعد العمولة حوالي 1,958. والإعلان هو هو 1,000، فالصافي يبقى حوالي 958.

يعني 3 طلبات من 20، اللي هم 15%، كلوا حوالي 26% من صافي ربحك. السبب إن فلوس الإعلان مبترجعش مع المنتج. الحسبة كاملة في حساب صافي الربح.

السياسة زي ما هي

احفظها ومتوعدش العميل بأكتر منها. الإرجاع خلال 3 أيام من الاستلام، بشرط إن المنتج ما اتستخدمش، إلا لو فيه عيب صناعة. والمستلزمات اللي بتلمس الجلد مبترجعش ولا بتتبدل، زي كراسي الحمام والمراتب والمخدات الطبية وأجهزة التنفس.

النص الرسمي دايمًا في صفحة الاستبدال والاسترجاع. ولو المنتج من الحاجات الشخصية ومش لاقيه مذكور صريح، زي منتج عناية اتفتح أو حاجة بتتلبس على الجسم، اعتبره مبيرجعش لحد ما تتأكد من الصفحة أو من الدعم. وتصنيف المنتجات بالتفصيل في سياسة الاسترجاع.

وافصل بين العيب وبين مش عاجبني. الجهاز اللي مبيشتغلش من أول مرة، أو قطعة ناقصة، أو سوستة مكسورة، ده عيب صناعة وبيترجع حتى لو اتجرب. أما المقاس مش مريح أو كنت فاكره أكبر، ده تغيير رأي، وبيترجع بس لو ما اتستخدمش وفي خلال الـ 3 أيام. ولو العميل قال فيه عيب، اطلب منه صورة أو فيديو صغير على طول، وافتح تذكرة دعم برقم الطلب والتفاصيل.

قول مبيرجعش قبل البيع

المنتج اللي مبيرجعش مش مشكلة. المشكلة إن العميل يعرف ده بعد ما يستلم. نفس الجملة قبل الشرا بتتفهم أمانة، وبعده بتتفهم خداع، وبتنتهي بشكوى وتقييم وحش حتى لو ما رجعش حاجة.

اكتبها في آخر وصف المنتج، وقولها في الشات قبل ما تسجل، وخد عليها تمام مكتوبة. مثال لكريم أو برفان:

لاحظ إن الجملة دي بتقلب السياسة لخدمة: خليني أتأكد معاك. وده بالظبط اللي بيمنع الإرجاع.

المقاس الغلط

ده أشهر سبب في الهدوم والأحذية، وكمان في الدعامات والمشدات لو بتبيع مستلزمات طبية. العميل بيختار لارج عشان بيلبس لارج في ماركة تانية، والمقاس الحقيقي بيتقاس بالسنتي مش بالإحساس.

متسجلش طلب لبس من غير رقم بالسنتي من العميل لو جدول المقاسات موجود. خد الأرقام الحقيقية من صفحة المنتج، لأنها بتختلف من موديل للتاني، وقوله يقيس إزاي:

وفي الأحذية، طول القدم بالسنتي أدق من النمرة. وفي المستلزمات الطبية زي جوارب الدوالي، درجة الضغط الدكتور هو اللي بيحددها، وإنت دورك المقاس وبس.

الوعود الكبيرة

إعلان بيقول «مبيبهتش أبدًا» أو «بطارية تعيش يومين» بيجيب طلبات كتير، ويرجع نصهم. العميل ما لقاش اللي اتوعد بيه، فيرجّع أو يكتب تقييم وحش. وكمان الكلام ده ممكن يخالف سياسات الإعلانات في ميتا وتيك توك، خصوصًا في منتجات العناية والصحة.

بدل مبيبهتش أبدًا، قول قطن، واغسله على بارد عشان يعيش أطول. وبدل بطارية جبارة، قول الرقم اللي في المواصفات. الوصف الصادق ممكن يجيب طلبات أقل شوية، بس طلباته بتفضل وما بترجعش. البدائل كلها في الادعاءات في الإعلانات.

العميل مش فاهم يستخدمه

سماعة بلوتوث مش بتتوصل عشان العميل مدخلهاش وضع الاقتران، فيفتكرها بايظة. مكواة شعر اتشغلت على أعلى حرارة من أول مرة. دي مرتجعات بسبب سوء فهم، مش عيب، وشرح بسيط في وقته بيمنعها.

ابعت رسالة طريقة الاستخدام في نفس يوم التسليم، قبل ما العميل يفكر يرجّع. جرس الإشعارات هيقولك إن الطلب اتسلم، وزرار واتساب في صفحة الطلب بيفتح الشات على طول. فيها تهنئة، وكام خطوة من كتالوج المنتج، وأشهر غلطة، ويعمل إيه لو فيه مشكلة.

جملة ابعتلي هنا الأول بتخليك أول واحد يعرف بالمشكلة، فتحلها بشرح أو تذكرة دعم بدل ما تبقى مرتجع.

فترة الضمان

بعد التسليم الربح بيدخل فترة الضمان 10 أيام، وبعدها يبقى جاهز للسحب في المحفظة. والـ 3 أيام بتوع الإرجاع جوه الفترة دي، فأي مرتجع بيبان قبل ما الربح يوصل للجاهز للسحب.

مثلًا طلب اتسلم يوم 1 في الشهر. الإرجاع ممكن لحد يوم 3 تقريبًا، والربح يفضل في الضمان لحد يوم 11، وبعدها تسحبه في أقرب أحد أو خميس، والحد الأدنى للسحب 50 جنيه.

فمتحسبش المتوقع على إنه دخل. خطط مصاريفك وإعلاناتك على الجاهز للسحب بس. ولو المتوقع كبير والجاهز أقل منه بكتير بعد ما المدة تعدي، يبقى فيه تسريب من رفض أو إرجاع، فبص على المنتج المسؤول في أدائي. وخانات المحفظة متشرحة في محفظة الأرباح.

قبل الإعلان الجاي، اكتب قصاد كل منتج بتبيعه يترجع بشرط ولا مبيرجعش، واحفظ رسالة طريقة استخدام لكل واحد كرد سريع. ولو لسه ما بدأتش، التسجيل في تحسين مجاني.

الدرس الجاي: التسليم حسب المحافظة.