أول طلب دروب شيبينج: إزاي تسجل أوردر العميل من غير غلط
العميل قالك ابعتهولي. قبل ما تدوس تأكيد، اتأكد إن معاك رقم تاني وعلامة مميزة للعنوان. دي طريقة تسجيل الأوردر عشان يوصل.
أول عميل يقولك تمام ابعتهولي، هتبقى فرحان وعايز تسجل بسرعة. استنى دقيقة. أشهر سببين بيضيعوا اول طلب دروب شيبينج إن العميل له رقم واحد بس، وإن العنوان مفيهوش علامة يعرف بيها المندوب البيت.
كل خانة بتكتبها في الأوردر فيه اتنين هيقروها بعدك: اللي هيكلم العميل يأكد، والمندوب اللي هيدور على البيت. وفي الدفع عند الاستلام انت لسه مقبضتش حاجة، وربحك مش هيدخل المحفظة غير بعد ما الأوردر يتسلم.
اجمع كل حاجة قبل ما تفتح الموقع
متبدأش تسجل والعميل لسه بيكتبلك. خلي معاك الأول المنتج بالظبط: النوع والمقاس واللون والكمية. دعامة ركبة لوحدها مش كفاية. مقاس كام؟ واحدة ولا اتنين؟
وخلي معاك السعر النهائي اللي العميل قال عليه ماشي، شامل الشحن. رقم واحد. لو لسه مش فاهم سعر التكلفة، ارجع لدرس قراءة كتالوج المنتجات.
وبعدين بيانات العميل كاملة في رسالة واحدة. ومتسجلش أوردر ناقص وتقول فريق التأكيد هيكمل. هما بيكلموا العميل عشان يأكدوا، مش عشان يصلحوا غلطك.
تسجيل الأوردر خطوة خطوة
- حط المنتج في السلة. يا إما تفتح صفحة المنتج وتختار النوع والكمية، يا إما تستخدم «إضافة سريعة» من صفحة المنتجات على طول. التانية مريحة جدًا وانت بترد على العميل في نفس الوقت.
- راجع السلة. الكمية صح؟ النوع هو نفسه اللي بعتله صورته؟ لو المقاس غلط هنا، هيرجعلك بعدين.
- اكتب بيانات العميل: الاسم، رقم الموبايل، رقم تاني، المحافظة، والعنوان بالتفصيل.
- راجع الإجمالي، ودوس تأكيد.
في الاسم اكتب اسمه الحقيقي، اسمين أو تلاتة، مش أم أحمد ومش اسم حسابه على فيسبوك. الموبايل 11 رقم، راجعه رقم رقم.
الرقم التاني ده مهم جدًا. فريق التأكيد بيكلم العميل، ولو مردش بيحاولوا تاني لحد المحاولة التالتة، وبعدها الأوردر بيتأرشف. لو فيه رقم تاني لحد في نفس البيت أو قريب، فدي فرصة زيادة الأوردر يتنقذ. ومتكررش نفس الرقم في الخانتين. ولو الأوردر اتأرشف برضه، درس الطلبات المؤرشفة بيشرح إزاي ترجعه.
المحافظة كمان مش شكليات. مصاريف الشحن بتتحسب حسب المحافظة ونوع التوصيل، وكذلك ميعاد التوصيل. لو العميل ساكن على حدود محافظتين، اسأله صريح: انتوا تبع محافظة إيه؟
السعر لازم يطابق اللي قلته
انت اللي بتحدد سعر البيع. والشحن بيتحسب حسب المحافظة ونوع التوصيل، والعميل هو اللي بيدفعه عند الاستلام. فقبل ما تدوس تأكيد، بص على الإجمالي: سعر بيعك زائد الشحن. لازم يبقى هو نفس الرقم اللي قلته للعميل بالظبط.
أي فرق، ولو 20 جنيه، بيتحول على الباب لـ أنا متفق على سعر تاني، وبعدها رفض.
ولو نسيت تضيف ربح، السيستم هينبهك، وهيسيبك تكمل لو عايز، زي لو بتشتري لنفسك. حساب الربح والعمولة بالأرقام في الدرس الجاي.
العنوان
المندوب ميعرفش منطقتك. اكتب العنوان كأنك بتوصف الطريق لحد أول مرة يجي البلد. بالترتيب ده: المنطقة، الشارع، رقم العمارة، الدور والشقة، وعلامة مميزة.
عنوان وحش: مدينة نصر، عند السوبر ماركت.
عنوان كويس: مدينة نصر، الحي السابع، شارع (اسمه)، عمارة 14، الدور التالت شقة 9، قدام صيدلية (اسمها)، والمدخل جنب محل موبايلات.
العلامة المميزة لازم تكون حاجة ثابتة زي مدرسة أو جامع أو صيدلية أو محطة. مش عربية راكنة تحت البيت. وفي القرى اللي مفيهاش أرقام شوارع، العلامة هي العنوان نفسه: بعد الكوبري بـ 200 متر، البيت اللي جنب المدرسة، بيت الحاج فلان.
رسالة تجمع بيها البيانات
العميل مش بينسى البيانات قصد. بينساها عشان انت مطلبتهاش بترتيب. ابعتله دي بعد ما يوافق على السعر:
تمام يا فندم، عشان الأوردر يوصلك من غير تأخير محتاج منك:
- الاسم بالكامل:
- رقم الموبايل:
- رقم تاني نكلمه لو الأول مش متاح:
- المحافظة:
- المنطقة واسم الشارع:
- رقم العمارة والدور والشقة:
- علامة مميزة جنبك (محل، مدرسة، جامع):
الإجمالي (السعر) جنيه شامل الشحن، والدفع عند الاستلام. هيكلمك فريق التأكيد على رقمك خلال 24 ساعة، ياريت ترد عشان الطلب يتشحن.
آخر سطر ده مش مجاملة. هو بيجهز العميل للمكالمة، فيرد بدل ما يطنش رقم غريب. أكتر عن النقطة دي في درس تأكيد الطلبات.
بعد ما تدوس تأكيد
الأوردر هيظهر في طلباتك. خلال 24 ساعة فريق التأكيد هيكلم العميل. ابعتله رسالة صغيرة تفكره إن فيه حد هيكلمه النهارده. بعد التأكيد، الأوردر بيتشحن من مخزن تحسين. وكل ما الحالة تتغير هيجيلك تنبيه على جرس الإشعارات.
قول للعميل الميعاد الرسمي لمحافظته، مش بكرة إن شاء الله عشان انت متحمس. المواعيد لكل منطقة في درس مصاريف الشحن والتوصيل.
في صفحة الأوردر فيه زرار واتساب تكلم منه العميل على طول. ولو سجلت أوردر لرقم ليه سجل رفض قبل كده، هيظهرلك تنبيه «عميل عالي الخطورة». متطنشهوش. كلم العميل واتأكد إنه جد قبل ما الأوردر يتشحن.
لو العميل غير رأيه
بيحصل كتير. يكتبلك بعد ساعة: معلش هأجلها. الصح إنك تلغي الأوردر بنفسك قبل التأكيد، وتحسين بتسمحلك بده طول ما الأوردر لسه متأكدش.
متسيبهوش معلق على أمل إنه يقتنع في مكالمة التأكيد. أوردر هيترفض على الباب أوحش من أوردر اتلغى بدري، عشان بيبوظ نسبة التسليم عندك. وابعتله رسالة لطيفة:
ولا يهمك يا فندم، لغيت الطلب. لو احتجته في أي وقت ابعتلي وأسجلهولك تاني.
ولو عايز يغير الكمية أو المقاس قبل التأكيد، الأسلم تلغي وتسجل من جديد بالبيانات الصح. متعتمدش إنك تشرح التغيير لفريق التأكيد.
لو عندك عميل جاهز دلوقتي، افتح صفحة المنتجات وسجل أوردرك. ولو لسه معندكش حساب، التسجيل مجاني. وبعدها اقرا الدرس الجاي عن تحديد سعر البيع والربح المضاف.
سجّل دخولك وكل درس تخلّصه يتحسب: إفادة باسمك لكل وحدة، وشهادة بكود تحقق لما تخلّص الكورس.
سجّل مجانًاجاهز تطبّق؟ ابدأ مع تحسين مجانًا
من غير رأس مال ولا مخزن: تختار المنتج وتحدد سعر بيعك، واحنا بنأكد مع العميل ونشحن ونحصّل، وأرباحك بتوصل محفظتك.