جدول مقاسات الهدوم: تقيس العميل إزاي قبل الطلب
المقاس هو سبب المرتجع رقم واحد في الهدوم. دقيقة قياس بتوفر رحلة شحن رايحة جاية.
«أنا بلبس لارج». الجملة دي وراها مرتجعات كتير، لأن لارج في مصنع غير لارج في مصنع تاني. جدول مقاسات الهدوم بتاع المنتج نفسه هو المرجع، مش إحساس العميل.
جدول المنتج أولًا
على صفحة المنتج في تحسين هتلاقي المقاسات المتوفرة، وأحيانًا جدول بالسنتي. لو فيه جدول، هو ده اللي تختار منه. ولو مفيش، اسأل في تذكرة قبل ما تعلن، لأن العميل هيسأل.
العميل يقيس إيه
- تيشيرت وقميص: محيط الصدر، والطول من الكتف.
- بنطلون: محيط الوسط، والطول من الوسط للكعب.
- فستان وعباية: الصدر والوسط والطول.
«هاتي المازورة بتاعة الخياطة، وقيسي محيط الصدر من أعرض حتة والمازورة مش مشدودة، وابعتيلي الرقم بالسنتي. أو قيسي تيشيرت بتحبيه وهو مفرود على السرير، عرضه من تحت الباط للباط.»
الطريقة التانية (قياس قطعة موجودة) أسهل لأغلب الناس وأدق.
اختار انت
قارن الرقم بالجدول وقول المقاس صريح:
«بالمقاس ده المناسب ليكي XL. لو بتحبي اللبس واسع شوية خديه 2XL.»
سجّل الرقم
اكتب القياس في ملاحظة الطلب أو في الشات. لو حصلت مشكلة، هتعرف هل المقاس اتختار غلط ولا القطعة نفسها مقاسها مش زي الجدول.
خليه جزء من الإعلان
حط صورة جدول المقاسات في الإعلان والبوست. العميل اللي شاف الجدول قبل ما يكلمك نص المشوار خلص.
سجّل دخولك وكل درس تخلّصه يتحسب: إفادة باسمك لكل وحدة، وشهادة بكود تحقق لما تخلّص الكورس.
سجّل مجانًاجاهز تطبّق؟ ابدأ مع تحسين مجانًا
من غير رأس مال ولا مخزن: تختار المنتج وتحدد سعر بيعك، واحنا بنأكد مع العميل ونشحن ونحصّل، وأرباحك بتوصل محفظتك.