الستوري ولا البوست؟ تنزل منتجك فين لو لسه بادئ

السؤال ده بيتسأل كتير من الناس اللي لسه بادئة ومش بتدفع إعلانات. عندك حساب فيسبوك شخصي، وانستجرام، وحالة واتساب، وعايز تعرف تحط منتجك فين عشان حد يشوفه ويطلب.

الإجابة القصيرة: الاتنين. بس مش بنفس الكلام ومش بنفس الشكل.

الستوري بيشتغل مع اللي يعرفوك

الستوري وحالة الواتساب الناس اللي بتتفرج عليهم غالبًا معارفك. صحابك وقرايبك وزمايلك. دول عارفينك. اللي ناقصهم إنهم يعرفوا إنك بقيت بتبيع، وبتبيع إيه.

عشان كده الستوري لازم يبقى خفيف وكتير. صورة المنتج وجنبها سطر واحد. "متاح عندي جهاز ضغط ذراعي، التوصيل لحد البيت والدفع عند الاستلام." مش محتاج تصميم ولا لوجو.

الستوري بيختفي بعد 24 ساعة، وده في صفك. تقدر تنزل كل يوم من غير ما حد يحس إنك بتزن، عشان اللي فات بيروح. واللي بيشوف ستوري منك كل يوم، أول ما يحتاج حاجة من اللي بتبيعها بيفتكرك.

وفي حاجة الستوري بيعملها أحسن من أي حاجة: إنه يبين إن في شغل بيحصل فعلًا. سكرين شوت لرسالة عميل بعد ما استلم (بعد ما تشيل الاسم والرقم)، أو حتى سؤال سأله حد وإنت بترد عليه. دي بتقول للناس إن الموضوع جد.

وحالة الواتساب بالذات ليها ميزة. اللي بيشوفها لازم يكون مسجّل رقمك وإنت مسجّل رقمه، يعني ده حد يعرفك فعلًا. ولو حب يسأل، بيرد على الحالة نفسها ويبقى في شات معاك على طول. عشان كده لو حد سألك على حاجة مرة، اطلب منه يسجّل رقمك، وسجّل رقمه إنت كمان. جملة بسيطة زي "سجّل رقمي عشان تشوف الجديد عندي" بتكبّر الناس اللي بتتفرج عليك مع الوقت.

اعمل حسابك إن معارفك هما اللي هيتفرجوا، فمتنزلش عشر ستوريز ورا بعض في نفس الساعة. اتنين أو تلاتة في اليوم موزعين كفاية.

البوست بيفضل موجود

البوست شغلته تانية. ده اللي بيفضل على بروفايلك، واللي حد ممكن يدخل يشوفه بعد أسبوع لما صاحبه يقوله "فلان بيجيب الحاجات دي".

عشان كده البوست يبقى فيه تفاصيل أكتر. صور أوضح للمنتج من أكتر من زاوية، وبيتعمل بيه إيه، والمقاسات لو ليه مقاسات، والسعر شامل الشحن أو إزاي يعرفه، وإزاي يطلب. لو حد دخل بروفايلك ولقى بوست واحد واضح لكل منتج، هيطلب من غير ما يسأل عشرين سؤال.

والكلام في البوست اكتبه زي ما بتتكلم. مش محتاج تبدأه بجملة إعلانية كبيرة. حاجة زي "ناس كتير سألتني على دعامة الركبة، فدي التفاصيل كلها في مكان واحد" بتتقري أكتر من أي عنوان رنان، وبتبين إن في ناس بتسأل فعلًا.

ومتنزلش بوستات كتير ورا بعض. حسابك الشخصي مش صفحة محل، والناس متابعاك عشان إنت. لو بقى البروفايل كله بيع، هيبطلوا يشوفوك. بوست أو اتنين في الأسبوع مع كلامك العادي كفاية.

ولو عندك كتالوج من تحسين، استعمل زرار «عرض العميل» وابعت رابط الكتالوج بتاعك في البوست أو في البايو. الكتالوج ده بيعرض المنتجات من غير أسعار التكلفة ومن غير اسم تحسين، فالعميل يتفرج براحته.

نفس الصورة تنفع في الاتنين

مش محتاج تجهز صور مختلفة لكل مكان. صورة واحدة كويسة للمنتج تقدر تنزلها بوست بالتفاصيل، وبعدين تنزلها ستوري بسطر واحد وتعمل منشن أو تكتب "التفاصيل في البوست". وبعد يومين تنزلها تاني ستوري بزاوية تانية، زي سؤال عميل عنها.

وفي حاجة بقولها لكل حد بادئ: متنزلش أي حاجة عن المنتج فيها كلام إنه بيعالج أو بيشفي. حتى لو حسابك شخصي ومش إعلان ممول، الكلام ده غلط، وبيتنقل بالسكرين شوت بعد كده باسمك.

وبالنسبة للمواعيد، جرّب بنفسك. انزل ستوري الصبح وستوري بالليل لمدة أسبوع، وبص على عدد المشاهدات وعدد الناس اللي ردت. أنا مش هقولك ساعة معينة، عشان معارفك إنت ليهم مواعيدهم.

لو هتبدأ النهارده، ابدأ بستوري. أسهل وأسرع. البوست اعمله لما يبقى عندك صور كويسة لمنتج واحد على الأقل.